సారథిలో 'వీడు మనవాడే'

'కిక్' చిత్రంలో సిన్సియర్ పోలీస్ ఆఫీసర్ గా నటించిన శ్యామ్ కు ఆ చిత్రం మంచి పేరు తెచ్చింది. తాజాగా శ్యామ్ హీరోగా 'వీడు మనవాడే'పేరుతో ఓ చిత్రం రూపొందుతోంది. అన్నం ఫిలిం ఇంటర్నేషనల్ పతాకంపై సి.విజయకుమార్ ఈ చిత్రాన్ని నిర్మిస్తున్నారు. నేతాజీ దర్శకుడు. ఈ చిత్రం షూటింగ్ ప్రస్తుతం సారథి స్టూడియోస్ లో జరుగుతోంది. సెట్స్ లోనే చిత్రయూనిట్ బుధవారంనాడు ఆ విశేషాలను తెలియజేసింది.దర్శకుడు నేతాజీ మాట్లాడుతూ, ఈ చిత్రాన్ని తమిళ, తెలుగు భాషల్లో రూపొందిస్తున్నామనీ, తమిళ వెర్షన్ ఇటీవలే విడుదలైందనీ చెప్పారు. తెలుగు వెర్షన్ కొద్దిరోజుల క్రితమే పూర్తి కావలసి ఉన్నప్పటికీ తమిళంలో మరో చిత్రానికి తాను అంగీకరించడంతో ఆ సినిమాకి పనిచేయాల్సి వచ్చిందనీ, ఈ చిత్రాన్ని తెలుగు నేటివిటికీ తగ్గట్టుగా షూటింగ్ చేస్తున్నామనీ చెప్పారు. కులుమనాలి, చెన్నై, మహాబలేశ్వరం తదితర ప్రాంతాల్లో షూటింగ్ చేశామని చెప్పారు. ఇందులో తాను ఫిషర్ మన్ గా నటిస్తున్నట్టు శ్యామ్ తెలిపారు. ఈ చిత్రం తెలుగులో తనకు మంచి గుర్తింపు తెస్తుందని ఆశిస్తున్నట్టు పేర్కొన్నారు. శ్యామ్ కు జోడిగా మల్లికాకపూర్, ఇతర పాత్రల్లో విజయభాస్కర్, రామిరెడ్డి, సైరాభాను, వేణుమాధవ్, రంగనాథ్ తదితరులు నటిస్తున్నారు. లతా నేతాజీ మాటలు, గాదిరాజు శ్రీనివాస్ సినిమాటోగ్రఫీ, ఆనంద్ ఫైట్స్ అందిస్తున్నారు.