సిద్దార్ధ-శ్రుతి చిత్రం షురూ

సిద్దార్ధ, శ్రుతి (కమల్ హాసన్ కుమార్తె) జంటగా ఎ బెల్లీఫుల్ ఆఫ్ డ్రీమ్స్ ఎంటర్ టైన్ మెంట్స్ ప్రైవేట్ లిమిటెడ్ పతాకంపై దర్శకేంద్రుడు కె.రాఘవేంద్రరావు ఓ కొత్త చిత్రాన్ని నిర్మిస్తున్నారు. రాఘవేంద్రరావు తనయుడు కోవెలమూడి ప్రకాష్ ఈ చిత్రానికి దర్శకత్వం వహిస్తున్నారు. రామోజీ ఫిలిం సిటీలో ఆదివారంనాడు ఈ చిత్రం షూటింగ్ పూజా కార్యక్రమాలతో ప్రారంభమైంది. హీరోహీరోయిన్లపై చిత్రీకరించిన ముహూర్తం సన్నివేశానికి ఎస్.ఎస్.రాజమౌళి క్లాప్ ఇవ్వగా, జాగర్ల మూడి రాధాకృష్ణ (క్రిష్) కెమెరా స్విచ్చాన్ చేశారు. కె.రాఘవేంద్రరావు గౌరవ దర్శకత్వం వహించారు.

సిద్దార్ధ మాట్లాడుతూ, ఇప్పటి వరకూ తెలుగులో అన్నీ ప్రేమకథా చిత్రాలే చేయడం వల్ల తనకు లవర్ బాయ్ ఇమేజ్ వచ్చిందనీ, అయితే అన్నిరకాల పాత్రలు చేయాలని తనకుండేదనీ ఆయన అన్నారు. అలాంటి అరుదైన అవకాశం ఇప్పుడు వచ్చిందన్నారు. ఇలాంటి గొప్ప పాత్రను ఇచ్చిన కె.రాఘువేంద్రరావుకు తన కృతజ్ఞతలని అన్నారు. ప్రకాష్ తనకు మంచి మిత్రుడే కాకుండా తెలుగు సినిమాకు అంతర్జాతీయ ఖ్యాతిని తెచ్చే సత్తా ఉన్నవాడనీ, భారతదేశం గర్వించదగిన నటుడు కమల్ హాసన్ కుమార్తె శ్రుతిహాసన్ తనకు జంటగా నటిస్తుండటం మరపురాని అనూభూతినిచ్చిందని అన్నారు. వైవిధ్యమైన కథ, మంచి ఆర్టిస్టులు, చక్కటి సాంకేతిక నిపుణులతో చేస్తున్న ఈ చిత్రం అద్భుత విజయాన్ని సాధిస్తుందనే నమ్మకం తనకుందని అన్నారు. ఒక మంచి టీమ్ తో పనిచేస్తుండటం సంతోషంగా ఉందని శ్రుతి హాసన్ పేర్కొంది. ప్రకాష్ మాట్లాడుతూ, వినూత్నమైన కథ-కథనాలు, ప్రెజంటేషన్ తో గ్రాఫికల్ వండర్ గా ఈ చిత్రాన్ని తెరకెక్కించనున్నట్టు చెప్పారు. ఈ చిత్రానికి జె.కె.భారవి-రమేష్ సామల మాటలు, సౌందర్ రాజన్ ఎస్. సినిమాటోగ్రఫీ, భూపేష్ ఆర్ భూపతి కళాదర్శకత్వం, శ్రావణ్ ఎడిటింగ్, మిక్కీ జె.మేయర్ సంగీతం అందించనున్నారు.